මහජන ආරක්ෂාව සහ පාර්ලිමේන්තු කටයුතු නියෝජ්‍ය අමාත්‍ය ගරු සුනිල් වටගල මැතිතුමා, ජපාන තානාපති අතිගරු අකියෝ ඉසමාටා මැතිතුමා, එක්සත් ජාතීන්ගේ ජනගහන අරමුදලේ ශ්‍රී ලංකා නියෝජිත කුන්ලේ අඩෙනියි මහතා, මහජන ආරක්ෂාව සහ පාර්ලිමේන්තු කටයුතු අමාත්‍යාංශයේ ලේකම් ඩී.ඩබ්.ආර්,බී. සෙනෙවිරත්න මහතා, මහජන ආරක්ෂාව සහ පාර්ලිමේන්තු කටයුතු අමාත්‍යාංශයේ අතිරේක ලේකම් දමයන්ති කරුණාරත්න මහත්මිය, ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතා, පොලිස් ළමා හා කාන්තා අපයෝජන විමර්ශන දිශාව භාර නියෝජ්‍ය පොලිස්පතිනි රේණුකා ජයසුන්දර මහත්මිය, කලුතර දිශාවේ ජ්‍යෙෂ්ඨ පොලිස් අධිකාරි කාවින්ද පියසේකර මහතා, මූලස්ථාන පොලිස් පරීක්ෂක රුවන් විජේසිංහ මහතා සහ කලුතර දිශාවේ පොලිස් නිලධාරීහු කළුතර දකුණු පොලිස් ස්ථානය තුළ ජපානයේ අරමුදල් සහිතව ඉදිකරන ලද ආදර්ශ කාන්තා හා ළමා කාර්යාංශය (EWA) නිල වශයෙන් ශ්‍රී ලංකා පොලිසියට භාර දීම සඳහා වූ විවෘත කිරීමට සහභාගි වූහ. එය ස්ත්‍රී පුරුෂ භාවය මත පදනම් වූ ප්‍රචණ්ඩත්වයට (GBV) ශ්‍රී ලංකාවේ ප්‍රතිචාරය ශක්තිමත් කිරීමේ තවත් තීරණාත්මක පියවරකි.
කළුතර දකුණ EWA පිහිටුවීම ජපන් ජනතාවගේ ඇමරිකානු ඩොලර් 34,000 ක ත්‍යාගශීලී අරමුදල් ආධාරයෙන් සිදු වූ අතර, ඉදිකිරීම් සඳහා වර්ල්ඩ් විෂන් ලංකා ආයතනය සහාය විය.
කළුතර දකුණ ආදර්ශ කාන්තා හා ළමා කාර්යාංශය, පසුගිය වසරේ පමණක් කාන්තාවන් සහ ළමුන් 4000 කට අධික සංඛ්‍යාවකට සහාය ලබා දුන් යාපනය, මිරිහාන, පුදුකුඩුඉරිප්පු, නුවරඑළිය, මුන්දලම්, මඩකලපුව සහ මහනුවර ඇතුළු ශ්‍රී ලංකාව පුරා ක්‍රියාත්මක වන EWA ජාලයට එක් වේ. මෙම ආරක්ෂිත අවකාශයන් තාවකාලික විවේක ප්‍රදේශ ලෙස සේවය කරන අතර, ස්ත්‍රී පුරුෂභාවය මත පදනම් ප්‍රචණ්ඩත්වයේ වින්දිතයන්ට ආරක්ෂාව, මනෝ සමාජයීය සහාය, වෛද්‍ය යොමු කිරීම්, නීති ආධාර සහ යුක්තිය වෙත වින්දිත කේන්ද්‍රීය එළඹුමක් සපයයි.
මෙම ව්‍යාපෘතියේ කොටසක් ලෙස, ඉදිරි සති කිහිපය තුළ ධර්මපුරම් (කිලිනොච්චි දිස්ත්‍රික්කය), මුරුන්කන් (මන්නාරම දිස්ත්‍රික්කය), උප්පුවේලි (ත්‍රිකුණාමලය දිස්ත්‍රික්කය), ඕපනායක (රත්නපුර දිස්ත්‍රික්කය), වලපනේ (නුවරඑළිය දිස්ත්‍රික්කය) සහ මෝදර (කොළඹ දිස්ත්‍රික්කය) යන ප්‍රදේශවල තවත් ආදර්ශ කාන්තා හා ළමා කාර්යාංශ හයක් ස්ථාපිත කෙරේ. මෙම පහසුකම් මගින් ස්ත්‍රී පුරුෂභාවය මත පදනම් ප්‍රචණ්ඩත්වය සම්බන්ධව කටයුතු කිරීමේ ශ්‍රී ලංකාවේ කැපවීම මෙන්ම වින්දිතයන්ට අත්‍යවශ්‍ය සේවාවන් ගිලිහී නොයාම තහවුරු කරයි.
